Home Foto-Galerie Links Historique Archiv Kontakt
23.11.2014: 2. Divisioun, 1. Bezierk, 13. Spilldag: Young Boys Dikrech vs. Racing Ëlwen 2-2 (0-0)  An enger spannender Partie trennen sech d'Young Boys an Ëlwen um Sonndeg mat 2-2 an dat obwuel  d'Jongen eng ganz Rei gudder Chancen haten. Di éischt véirel Stonn huet en Haushäre gehéiert di hätte  missen a Féierung goen nodeems den Raf alleng op de Gol konnt duerlafen. Leider huet den Ofschloss ze wënschen iwwreg gelooss an di Ëlwener sinn doropshin besser an d'Spill komm. Ze notéiere sinn zwou  gutt Chancen vir de Gaascht déi duerch eng Parade vum Emanuel an duerch d'Lat net zu engem Gol  gefouert hunn.  U Goler sollt et an der zweeter Halbzeit net maangelen. Dikrech koum staark aus der Kabinn mee konnt  eng ganz Rei u Chance net verwäerten. Et waren dunn di Ëlwener di sech no enger Partie Doppelpäss an  de Strofraum konnten kombinéieren an dem Emanuel keng Chance gelooss hunn. Di Dikrecher Äntwert  huet awer net laang op sech waarde gelooss. Direkt den éischte Corner nom Réckstand konnt den Jonas  mam Kapp verwäerten an et stoung 1-1. Kuerz viru Schluss geet e Weitschoss u Frënd a Feind laanscht  bis bei den Miles, deen aus engem Meter mat der Feescht den 2-1 marquéiert. Et waren dunn awer di  Ëlwener di direkt konnten äntwerten an en ofgefälschte Schoss kuerz virum ofgepaff an de Wénkel gesat  hunn. ***** 16.11.2014: 2. Divisioun, 1. Bezierk, 12. Spilldag: FC Préizerdaul-Réiden vs. Young Boys Dikrech  4-1 (0-1)    Um Sonndeg verléieren d’Young Boys duerch eegent Feelverhalen mat 4-1 zu Réiden. Di éischt Halbzeit  hunn d’Supporter eng konzentréiert an deels gutt Partie vun Dikrech kenne gesinn, déi roueg kombinéiert  hunn an keng héichklasseg Chance zougelooss hunn. Et war dunn de Ben deen sech kuerz virun der  Halbzeit op der rechtser Bande duerchgesat krut an de Ball alleng virum Gol laanscht de Golkipp gesat  krut.   Di Réidener koumen motivéiert aus der Kabinn an et war eisen alen Spille, den Patrick Zigrand, deen sech  no puer Minutten un der Strofraumgrenz duerchgetankt krut an de Ball schéin an de laange Wénkel konnt  setzen. Doropshin hunn d’Jongen komplett de Fuedem an d’Nerven verluer, wat een konnt um Belton  gesinn, deen sech zu enger Tätlechkeet hiräisse gelooss huet an de Miguel sech dunn als Feldspiller am  Gol erëmfonnt huet. Den éischte Corner no der rouder Kaart konnt alt erëm den Patrick notzen an zum 2-1 akäppen. Doropshin hunn d’Jongen zwar alles novirgeheit, mee no hannen gouf et logescherweis ëmmer  méi Lächer. De Match gouf dunn leider och ëmmer méi ruppeg an et koum souguer zu engem  Handgemenge am Réidener Strofraum. D’Haushären haten d’Heft bis zum Schluss fest an der Hand an  hunn dem aarme Miguel no zwee Konteren keng Chance gelooss. Den Miles hat an de läschte Minutten  nach den 4-2 um Fouss, mee den Réidener Golkipp war net méi ze iwwerwannen.    De nächste Match ass e Sonndeg um 16 Auer doheem géint Ëlwen. ***** 9.11.2014: 2. Divisioun, 1. Bezierk, 11. Spilldag: Young Boys Dikrech vs. SC Ell  2-1 (1-0)   No enger vun de beschte Leeschtungen an dëser Saison setzen d’Young Boys sech dëse Sonndeg  verdéngt mat 2-1 géint Ell duerch. De Ball bei den Haushären ass propper zirkuléiert an d’Jongen koumen  duerch e rouegen Spillopbau an e gutt Kuerzpassspill zu den éischten Geleeënheeten. Vir de Gaascht war trotz alle Beméiungen meeschtens bei der Stroofraumgrenz Schluss. No enger wäiter Flank vum Heldrad,  deen virdrun enger e bëssen ze laanger Pass huet misse nolafen, lant de Ball beim Miles deen de Ball  kann ouni Problem versenken.   Kuerz drop war Paus a béid Equipen hunn sech vill vir di zweet Halbzeit virgeholl. Ell koum aggressiv aus  de Kabinnen an d’Jongen haten méi Problemer hire Géigner vum Gol ewechzehalen. De Virdeel war, datt  Dikrech ëmmer méi zu gudden Konterméiglechkeeten koum, di awer entweder um gudden Golkipp oder  un schlechten Ofschlëss gescheitert sinn. Di éischt wierklech gutt Méiglechkeet vir de Gaascht war dunn  direkt dobannen: ee Spiller konnt sech lenks am Strofraum fräispillen an schéckt de Ball schéin an de  laange Wénkel. D’Jongen waren awer net laang beandrockt an hunn hiert Spill wieder duerchgezunn. An  der 90er Minutt fënnt dunn erëm eng Flank den Miles deen am Duercherneen den Iwwerbléck behalen  huet an esou zum Matchwinner ginn ass.    De nächste Match ass e Sonndeg um 16 Auer zu Réiden. ***** 5.11.2014: 2. Divisioun, 1. Bezierk, 10. Spilldag: US Feelen vs. Young Boys Dikrech 2-2 (2-1)    An engem spannenden Match um Mëttwoch Owend konnten d’Jongen ee Punkt beim Tabellenéischten  entféieren. D’Young Boys hunn direkt de Wee no vir gesicht an koumen virun allem iwwert e staarke  Miguel iwwert di rechts Säit zu Geleeënheeten. Feelen ass mat der Zäit awer ëmmer méi staark ginn an  ass och di eng oder aner Kéier geféierlech bis virun de Strofraum komm. Een Fräistouss vun hallef lenks  konnt den Emanuel leider just ofpralle loossen an den Feelener Stiermer huet am schnellste geschalt an  den 1-0 geschoss. Kuerz drop fënnt en Feelener Corner den richtege Kapp an et stoung 2-0 vir  d’Haushären. D’Äntwert vun de Jongen koum awer quasi am Géigenzuch, wéi de Miles sech gutt  duergesat kruut an de Ball aus kuerzer Distanz matt Schmockes annetze konnt.    No der Halbzeit war et en ganz emkämpfte Match matt villen Zweekämpf am Mëttelfeld. Dikrech hat  zweemol Chance datt en Feelener Stiermer am Abseits stoung an zeréckgepaff gouf. Ee schaarfe  Fräistouss vum Mich aus gutt 30 Meter zentral virum Gol fënnt dunn am Gestochers den Chinedu deen  den Ausgläich konnt marquéieren. Doropshin hunn béid Equippen nach d’Entscheedung gesicht, mee et  ass am Endeffekt mat engem gerechten Remis zu Enn gaang.    De nächste Match ass e Sonnden um 16 Auer doheem géint Ell. ***** 31.10.2014: Coupe de Luxembourg: 4. Tour: Swift Hesper vs. Young Boys Dikrech 5-0 (2-0)    Um Freiden den Owend verléiert Dikrech verdéngt an der Coupe zu Hesper, an dat well Hesper zum  engen zwou Klasse besser war, an zum aneren well d’Jongen sech onnéidegerweis selwer geschwächt  hunn. Di éischt Halbzeit huet Hesper gutt ëmgeschalt an eis Mëttelfeld schnell iwwerbréckt, mee  d’Chancen goufen liichtfäerteg leie gelooss. D’Young Boys waren awer net chancelos an konnte souguer  en Treffer op de Potto verbuchen. No zwee Fehler an der Defense stoung et an der Halbzeit allerdéngs  schonn 2-0 vir den Haushär, di och méi héich hätte kinnte vir sinn.   Di zweet Halbzeit hunn d’Jongen wieder couragéiert no vir gespillt, mee d’Fehler am Mëttelfeld an en  souveräne Géigner hunn net vill zougelooss. Souveränitéit an e bessere Stil hätten och eis Spiller  gebraucht, déi nom 3-0 duerch en Eelefter hir Nerven net méi am Grëff haten., Vir d’éischt kritt den Ivan  seng zweet giel Kaart wéint Meckeren an kuerz drop spréngt de Nelson engem Géigner mat den zwee  Féiss vir an d’Been an kritt zu Recht direkt di roud Kaart. Den 4-0 koum no enger schéiner Flank an  engem nach méi schéine Käppert zustan an de 5-0 Endstand duerch en plazéierte Weitschoss an de  Wénkel.   De nächste Match ass e Mëttwoch um 19-30 zu Feelen.  ***** 26.10.2014: 2. Divisioun, 1. Bezierk, 9. Spilldag: Young Boys Dikrech vs. Jeunesse Gilsdref  2-1  (1-1)   Eng spannend Partie mat deem méi glécklechen Ausgang vir d’Young Boys hunn di ronn 125 Supporter e  Sonndeg zu Dikrech kenne materliewen. D’Jongen hunn eng ganz staark Ufanksphase gewisen an sech  fréi ronderëm de Gilsdrefer Strofraum positionéiert. No knapps 10 Minutten fënnt en Corner dem Jonas säi Kapp, deen verlängert op den Ivan deen an de Wénkel kann akäppen. Duerno hunn d’Young Boys awer e  bëssen nogelooss an Gilsdref konnt sech e puer Méiglechkeeten erausspillen. No engem schaarfe  Fräistouss kritt e Gilsdrefer de Kapp nach un de Ball a verlängert deen an de laangen Eck, esou datt de  Belton keng Chance hat den Ausgläich ze verhënneren.   Di zweet Halbzeit war haart emkämpft an et gouf och di eng oder aner giel Kaart. Mol hat Dikrech eng méi  staark Phase, mol di Gilsdrefer. Den Ivan huet eng gutt Chance léie gelooss, wéi en alleng op de Gol  duerleeft mee de Ball leider driwwer setzt. Kuerz viru Schluss kënnt dunn och e Gilsdrefer alleng op de  Belton duergelaf, mee eise Golkipp konnt de Schoss halen. Di 5 Minutten Nospillzäit haten et dunn an  sech. An der 93. kruten d’Jongen en ëmstriddenen Eelefter gepaff, deen den Ivan plazéiert an de rietsen  Eck setzt. Duerno ass Gilsdref rosen géint d’Néierlag ugelaf, mee se konnten sech net méi entscheedend  duerchsetzen. Kuerz viru Schluss gouf et dunn nachengkéier Opreegung, wéi den Arbiter leider  fälschlecherweis dem Raf eng giel Kaart ginn huet, déi am Fong vir de Chinedu war. Et war seng zweet,  sou datt Dikrech déi läscht Minutt zu 10 huet missen iwwerstoen.    De nächste Match ass e Freideg um 20 Auer an der Coupe zu Hesper. ***** 19.10.2014: 2. Divisioun, 1. Bezierk, 8. Spilldag: Young Boys Dikrech vs. FC Sporting Mäerzeg   1-1 (1-1)    No enger spannender Partie trennen sech d’Young Boys a Sporting Mäerzeg um Enn mat 1-1. Géint een  vun den Opstiegskandidaten hunn d’Jongen sech deelweis staark presentéiert an och di éischt gutt  Méiglechkeet geet op den Dikrecher Konto, wéi de Raf alleng virum Gol e bëssen ze presséiert den  Ofschloss gesicht huet an  de Golkipp de Ball konnt halen. Mäerzeg war dorops hin e Stéck besser a  koum och zu hire Méiglechkeeten. Ee Weitschoss konnt de Belton dunn just ofpralle loossen an e  Mäerzeger Stiermer hat keng Problemer vir de Noschoss eran ze setzen. Dikrech huet sech awer  onbeandrockt gewisen a koum zu weideren gudden Ugrëff. Virun der Paus setzt de Miles sech am  Strofraum géint zwee Verteideger duerch a setzt de Ball ënnert d‘Lat.   No der Paus gouf de Match dunn méi aggressiv, an et koum zu enger Rei Fouls an Diskussiounen op  béide Säiten. Di zwou Equipen wollten déi dräi Punkten a Mäerzeg war eemol ganz no drun, wéi se no  engem Konter alleng op de Belton duergelaf sen, mee de Potto hinnen am Wee war. Dikrech hat manner  Problemer mam Aluminium mee méi mam Abseits, wouduerch den een oder aneren Ugrëff an souguer e  Gol ofgepaff goufen. Ënnert dem Strich kann een vun engem gerechten Remis schwätzen.   De nächste Match ass e Sonndeg um 16 Auer doheem géint Gilsdref ***** 12.10.2014: 2. Divisioun, 1. Bezierk, 7. Spilldag: FC Alisontia Steesel vs. Young Boys Dikrech 3- 1 (1-1)   Di nächst Néierlag gouf et vir Dikrech e Sonndeg zu Steesel. Den Haushär huet d'Heft vun Ufank un an d'Hand geholl a koum e puer mol geféierlech virun den Dikrecher Gol. No engem Corner gouf et en groussen Duercherneen an eiser Defense an e Steeseler Spiller konnt de Ball, deen em vrun d'Féiss gefall ass, aus kuerzer Distanz annetzen. D'Jongen hu sech awer net verstoppt an den Réckstand séier verdaut. No enger gudder Flank vu lénks war de Raf op der Platz a konnt akäppen. Kuerz drop war Dikrech du just nach zu 10. um Terrain, dat no enger Noutbrems vum Pele.   D'Young Boys konnten den 1-1 nach an d'Halbzeit retten an haten bei engem Distanzschoss Chance, datt d'Lat déif genuch houng. No der rouder Kaart ass awer net méi vill zesummegelaf an et waren di Steeseler, di op den 2-1 gedréckt hunn. Deen ass dunn per Eelefter gefall no engem Foul vum Mich am Strofraum. Kuerz viru Schluss hunn d'Jongen dunn nach den 3-1 kasséiert, dat no engem schéinen Schoss aus gutt 16 Meter an de Wénkel.   Weider geet et e Sonndeg um 16 Auer doheem géint Mäerzeg. ***** 05.10.2014: Coupe de Luxembourg: 3. Tour: Young Boys Dikrech vs. Koeppchen Wuermer 2-1  (1-1)   E Sonndeg hunn d’Young Boys verdéngt doheem géint Wuermer aus der éischter Divisioun gewonnen an  stinn domat an der 4. Ronn vun der Coupe. De bessere Start hat allerdéngs de Gaascht, deen no 20  Minutten en berechtegten Eelefter krut. De Belton war nach mat enger Hand drun, mee de Ball ass  onglécklech duerchgerutscht. Dikrech huet sech awer am Verglach zu den zwee Matcher virdrun stark  fomrverbessert gewisen an huet bis zum Schluss wéineg Chancen zougelooss. Virun der Halbzeit dunn  gouf den Filippe am Strofraum ugespillt a konnt sech géint d’Verteidegung an de Golkipp duerchsetzen.   De Start an di zweet Halbzeit war ganz nom Goût vun de Young Boys. No engem schéinen Doppelpass  iwwer lenks konnt den Raf alleng op de Keeper duerlafen an versenkt de Ball am laangen Eck. D’Jongen  hu stark weidergespillt, just den drëtte Gol wollt net falen. Wuermer hat eng gutt Chance per Weitschoss,  deen de Belton awer nach erausfësche konnt. Zum Schluss huet de Gaascht op den Ausgläich gedréckt,  mee se kruten de Ball net méi geféierlech op den Dikrecher Gol.   De nächste Match ass e Sonnden um 16 Auer zu Steesel. ***** 01.10.2014: 2. Divisioun, 1. Bezierk, 6. Spilldag: Young Boys Dikrech vs. Jeuness Useldeng  2-3  (0-2)   Um Mëttwoch Owend gouf et eng batter Néierlag doheem géint Useldeng. D’Young Boys stoungen an der  Ufanksphase därmoosse nieft sech, dat se dem Géigner duerch zwou katastrophal Réckpäss no 8  Minutten zwee Goler geschenkt hunn. Duerno kruten se sech zwar e bësse gefaangen, mee et sollt bis  d’Paus kee Gol méi geléngen.   An der zweeter Halbzeit hunn d’Jongen dunn gedréckt an am Ufank keng Konteren zougelooss. Eng  Flank vu lenks huet den Ivan riets am Strofraum fonnt deen de Ball schéin an de laange Wénkel setze  konnt. Kuerz duerno huet den Miguel sech bis an de Strofraum getankt an den Ausgläich marquéiert.  Géint Enn vum Match sinn di kämpferesch staark Useldenger awer och erëm méi staark ginn an konnte  kuerz virum Ofpaff nach e Konter setzen deen hinnen di 3 Punkten bruecht huet.   De nächste Match ass e Sonnden um 4 Auer doheem géint Wuermer an der Coupe. ***** 28.09.2014: 2. Divisioun, 1. Bezierk, 5. Spilldag: AS Housen vs. Young Boys Dikrech 5-2 (2-1)    Eng fatzeg awer net onverdéngte Néierlag vir d’Young Boys gouf et e Sonnden zu Housen. Béid Equipen  hu sech vun Ufank un net vill geholl an esou gouf et di eng oder aner gutt Chance op béide Säiten. No  engem Corner war di Dikrecher Defense schlecht organiséiert an Housen konnt den 1-0 käppen. Kuerz  drop huet den Ivan en Fräistouss op d’Lat gesat an den Ausgläich loung an der Loft. Kuerz virun der  Halbzeit dunn den 1-1 duerch de Miles, deen en Ofpraller konnt verwandelen. Den Housener Ustouss ass  dunn direkt an en Ugrëff iwwer lénks iwwergaangen, de Ball koum an de Strofraum an huet e Stiermer  fonnt deen ofgezunn huet. De Belton konnt den éischte Schoss nach halen, géint de Noschoss awer  näischt méi maachen an sou ass et mat engem 2-1 vir den Haushär an d’Paus gaang.   D’Jongen hunn e geschockten Androck gemaach an sech an der zweeter Halbzeit net méi vill Chancen  eraus gespillt. Housen huet gutt gekontert, an no enger Flank vu lénks steet eis Defense erëm falsch an  een Housener Spiller konnt den 3-1 käppen. Dikrech huet awer schnell mam 3-2 geäntwert, dat wéi den  agewiesselte Miguel e Fehler an der Defense äiskal ausnotze konnt. Kuerz drop awer den K.O. vir  Dikrech, wéi de Belton e gudde Fräistouss ofprallen gelooss huet an den géigneresche Stiermer de  zweete Schoss an d’Netz setze konnt. Duerno huet Dikrech zwar nach ëmmer alles probéiert, mee e  Konter kuerz viru Schluss huet dunn den Endstand hiergestalt.   De nächste Match ass e Mëttwoch um 20 Auer heiheem géint Useldeng.  ***** 24.09.2014: 2. Divisioun, 1. Bezierk, 4. Spilldag: Young Boys Dikrech vs. AS Rupensia Lusitanos  Fiels  6-0 (3-0)    Um Mëttwoch Owend gouf et eng héich Victoire vir Dikrech doheem géint d’Fiels. D’Young Boys waren  iwwert 90 Minutten di kloer bestëmmend Equipe an hunn no puer Sekonnen well missen a Féierung goen,  mee dem Miles säi Schoss  huet e puer Zentimeter gefeelt. D’Fiels hat am ganze Match eng eenzeg gutt  Chance, mee de Belton konnt de Schoss aus kuerzer Distanz paréieren. Bis an di 30. Minutt huet et dunn  gedauert bis den 1-0 gefall ass, dat nodeems den Ivan een Ofpraller direkt virun der Linn konnt  erandrécken. Kuerz drop gouf et en Handeelefter vir Dikrech, deen de Nelson ouni Problemer verwandelt  huet, ier de Miles kuerz virun der Halbzeit nach emol schéi fräigespillt gouf an deskéier de Ball an de Filet  konnt setzen.   Di zweet Halbzeit hat et dunn därmoossen an sech, datt ee net méi weess, wat der Rei no geschitt ass. Di  Fielser kruten bannen enger véirel Stonn ganzer zwou giel-rouder an eng roud Kaart, an hunn sech zum  Schluss just nach mat 7 Feldspiller kënne wieren. Aus zwee vun deenen dräi roude Kaarten ass en  Eelefter an e Fräistouss erausgespronge. Den Eelefter huet de Jon souverän verwandelt, den Fräistouss  huet den agewiesselten Elio an de Wénkel gesat. Et as iwwerflësseg ze soen, datt Dikrech zum Schluss  vun der zweeter Halbzeit eng ganz Rei gutt Chancen hat. De Schlusspunkt setzt dunn nach emol den Elio,  deskéier mat engem Konschtschoss aus gutt 20 Meter an den laangen Eck.   De nächste Match ass e Sonnden um 4 Auer zu Housen.  ***** 21.09.2014: 2. Divisioun, 1. Bezierk, 3. Spilldag: Blo-Wäiss Miedernach vs. Young Boys Dikrech  0-1 (0-0)    Eng knapp Victoire gouf et vir d’Jongen gëschter um neien Terrain zu Miedernach. Anescht wéi an de  Matcher virdrun war Dikrech deskéier vun Ufank un wakreg, an di éischt Chance hätt scho bal den 1-0  bruecht, wann de Golkipp net gutt reagéiert hätt. Och duerno hunn d’Young Boys sech di eng oder aner  gutt Chance ausgespillt, an hir Supporteren hunn just nach op den éischte Gol gewaart. Miedernach huet  awer den een oder aneren villverspriechenden Ugrëff gestart an sinn kuerz virun der Halbzeit bal selwer a  Féierung gaangen, de Ball ass awer just un d’Aussenetz gaang.   No der Paus huet Dikrech nach méi gedréckt an de Géigner hat Problemer hannen eraus ze kommen. No  enger knapper véirel Stonn am zweeten Duerchgang verlängert den Raf en Fräistouss op den Chinedu,  deen de Ball aus kuerzer Distanz laanscht de Golkipp setzt. No der Féierung hunn d’Jongen dunn  allerdéngs d’Heft aus der Hand ginn an Miedernach koum zu engem Grapp voll gudder Chancen, bei  deenen oft nëmmen e puer Zentimeter gefehlt hunn. Kuerz viru Schluss lafen den Chinedu an duerno den  Heldrad alleng op de Miedernacher Golkipp zou a kënnen allen zwee den Deckel net dropmaachen. Dëst  gouf dunn an der fënnefter Minutt vun der Nospillzäit bal nach bestrooft, wéi den Arbiter en Handeelefter  vir d’Haushäre ginn huet. Den ongléckleche Miedernacher Spiller setzt deen allerdéngs e Meter iwwert de  Gol an Dikrech rett di knapp Féierung iwwert d’Zäit.   En Mëttwoch den Owend ass de nächste Match um 19:30 doheem géint d’Fiels.  ***** 14.09.2014: Coupe de Luxembourg: 2.Tour: Young Boys Dikrech vs. Daring Iechternach 4-1 (1-1)     Um Sonndeg gewënnt Dikrech verdéngt géint Iechternach an zitt domatt an di drëtt Ronn vun der Coupe  an. Di éischt Halbzeit war vun villen Ongenauegkeeten an Fehlpäss op béide Säiten geprägt. No puer  Minutten krut Dikrech en Eelefter no engem Foulspill, deen den Ivan ouni Problemer verwandelt huet.  Kuerz drop de selwechten Szenario op der anerer Säit, wéi den Teo een Iechternacher am Strofraum vun  hannen vun den Been geholl huet, an de Gaascht esou konnt per Eelefter ausgläichen.   Wéi schonn an de Matcher virdrun sënn d’Jongen dunn e gutt Stéck méi staark aus der Kabinn komm an  hunn keng nennenswäert Chancen méi zougelooss. Den 2-1 fält no engem Fräistouss, nodeems den  Chinedu richteg steet an den Ofpraller an de Filet setzt. Kuerz drop gëtt en den zweeten Eelefter vir  Dikrech, deen den Ivan mat grad esou wéineg Problemer verwandelt wéi schonns den éischten. Di  Iechternacher hunn awer net opginn, an de Match ass op béide Säiten méi aggressiv ginn. No enger  Partie Foulspiller gouf dunn awer och erëm Futtball gespillt. Eng 10 Minutte virum Schluss gëtt den  Chinedu am Strofraum gutt ugespillt an mëscht aus der Dréiung den Deckel zou.   Wieder geet et am Championnat nächsten Sonndeg um 4 Auer zu Miedernach. ***** 7.09.2014: 2. Divisioun, 1. Bezierk, 2. Spilldag: Young Boys Dikrech vs. Olympia Crëschtnech-  Waldbëlleg  4-1 (1-0)    No der verdéngter Defaite am Optakt vum Championnat gouf et gëschter eng grad esou verdéngte  Victoire heiheem géint Crëschtnech-Waldbëlleg. No puer Minutten hëlt den Raf sech en Häerz an zitt aus  bal 20 Meter of; de Ball gëtt oofgefälscht an et steet 1-0 vir den Haushär. Duerno hunn d’Jongen  allerdéngs de Fuedem verluer an de Gaascht hat eng Partie gutt Geleeënheeten. Op der anerer Säit hunn d’Young Boys och zwou Honnertprozenteger leiegelooss, wéi den Raf an den Miles alleng virum Golkipp  de Ball net laanscht kruten.   An der zweeter Halbzeit hunn d’Jongen d’Fehler reduzéiert an de Ball gutt laanscht de Géigner zirkuléiere  gelooss. No enger schéiner Pass an d’Déift vum Nelson steet den Ivan alleng virum Golkipp an schéisst  den 2-0. Kuerz drop dunn awer en Eelefter vir de Géigner an de Virsprong vu just engem Gol as erëm  hiergestallt. Dat sollt sech allerdéngs mat engem Eelefter vir Dikrech schnell änneren, an eise Captain, de  Jon, stellt mam 3-1 den alen Ofstand nees hier. Crëschtnech-Waldbëlleg ass zum Schluss vun der Partie  lues a lues d’Loft ausgaangen, an et ass de Raf deen no engem Corner per Volley vir d’Endresultat suergt.   Nächste Sonndeg spille mer an der 2. Ronn vun der Coupe um 16 Auer heiheem géint Iechternach. ***** 03.09.2014 / 2. Divisioun, 1. Bezierk, 1. Spilldag: AS Colmar-Bierg vs. Young Boys Dikrech 3-2  (3-1) Nom gudde Start an d'Coupe gouf et gëschter Owend zu Colmar-Bierg eng verdéngte Néierlag vir Dikrech  am éischte Match am Championnat. Déi ersatzgeschwäschten Dikrecher Equipe huet sech di ganz éischt  Halbzeit mam aggressive Spill vum Haushär schwéier gedoen an krut keen richtegen Zougrëff. No kuerzer  Zäit stoung et schonn 2-0 vir d'Heemequipe, dat no engem schéinen Ugrëff iwwert di lénks Säit an no  engem Lopp iwwert de Belton, deen sech decidéiert hat, aus sengem Gol eraus ze lafen. Zu allem  Iwwerfloss huet den Onglécklechen kuerz drop och nach en Eelefter verursaacht, an et stoung 3-0 vir den  ASC. Kuerz virun der Halbzeit gouf et dunn en Handelefter vir Dikrech an et ass mat engem 3-1 an d'Paus  gaangen. An der zweeter Halschent waren d'Jongen dunn méi aggressiv an hunn kaum nach Chancen zougelooss.  Colmar-Bierg huet e puer mol gekontert, mee ouni nennenswäerten Ofschloss. Am Ugrëff ass bei Dikrech  leider och net vill zesummegelaf, an zum Schluss huet souguer missen eisen Ersatzgolkipp am Feld  spillen. Eng 10 Minutten viru Schluss koumen d'Jongen dunn awer nach zum Uschloss no engem gudde  Spillzoch iwwert di rechts Säit. Leider koum de Gol ze spéit, an den ASC konnt de Virsprong iwwert d'Zäit  retten. De nächste Match ass e Sonndeg um 16 Auer doheem géint Crëschtnech-Waldbëlleg. ***** 1.08.2014 / Coupe de Luxembourg: 1. Tour: Young Boys Dikrech vs. Jeunesse Biwer 5-0 (0-0)     E gudden Start an di nei Saison gouf et gëschter an der éischter Ronn vun der Coupe géint d’Jeunesse vu Biwer. Di éischt Halbzeit gouf allerdéngs vu béiden Equipen op déiwem Niveau gespillt, an et war souguer  1-2 mol dem Jon ze verdanken, datt d’Jongen net 1-0 a Réckstand gerode sinn.   Di zweet Halbzeit huet aus Dikrecher Sicht allerdéngs ee Prädikat verdéngt: Stark! D’Young Boys hunn  d’Heft an d’Hand geholl an de Ball iwwert di zweet 45 Minutten gutt zirkuléiere gelooss. Biwer koum zwar  nach di eng oder aner Kéier virun de Gol, dat awer ouni geféierlechen Ofschloss. Et war dunn den  Chinedu deen aus gutt 16 Meter aus der Dréiung di éischte Kéier annetze konnt. Kuerz drop konnt den  Miles per Noschoss géint säin ale Veräin op 2-0 erhéigen. No engem gudde Konter taucht dunn de Ben  alleng virum géigneresche Gol op an huet kee Krämpes den 3-0 ze marquéieren. Een Handelefter duerch  den Ivan, deen sech domat als zweeten Neizougang konnt an d’Gollëscht androen, an e wonnerbare  Schlänzer vum Nelson aus gutt 20 Meter hunn den 5-0 Endstand hiergestallt.   D’Championnat fänkt en Mëttwoch um 19:30 zu Kolmer un.  *****