Home Foto-Galerie Links Historique Archiv Kontakt
1. Divisioun, 1. Bezierk, 26. Spilldag: Young Boys Dikrech vs. Minerva Lëntgen 1-0 (0-0)  (18.05.2014)    No der 4-0 Victoire ënnert der Woch zu Mamer hunn d’Young Boys och hire leschte Match des Saison  géint Lëntgen gewonnen. De Match war vun Ufank un oppen, mat gudde Chancen op béide Säiten. Di  bescht Méiglechkeet hat den Eder, mee säi Konschtschoss huet leider nëmmen d’Lat getraff.   Och an der zweeter Halbzeit war et e montert Hin an Hier, mam besseren ausgaang vir Dikrech. De Belton  huet et gepackt d‘Këscht hannen propper ze halen an den Eder huet dunn eng Geleeënheet genotzt, vir  de Ball alleng virum Gol iwwert de Golkipp ze hiewen. Den 1-0 Virsprong gouf dunn bis zum Schluss  gehalen. Leider geet et d’nächst Saison an d‘2. Divisioun. Di gutt Leeschtungen an de leschte Wochen   maachen awer Courage, an mir hoffen, an engem Joer erëm eng Klass méi héich ze spillen.  1. Divisioun, 1. Bezierk, 24. Spilldag: Young Boys Dikrech vs. AS Wëntger 5-2 (3-1) (04.05.2014)    Mat enger gudder Leeschtung gewënnt Dikrech um Sonndeg um neien syntheteschen Terrain doheem  géint Wëntger, an et hätt nach den een oder anere Gol méi héich kënnen ausgoen. Et war knapps eng  Minutt gespillt, do kennt den Eder lénks am Strofraum un de Ball an setzt en an de laangen Eck. Kuerz  duerno eng ähnlech Situatioun, just datt den Eder deskéier ronderëm de Golkipp dribbelt an den  géignereschen Verteideger de Ball just nach hannert der Linn kann erauskraatzen. Viru gutt 60 Supporter  ass him dunn och nach den Hattrick gelongen, dat ganzt mat engem souverän verwandelten Eelefter.   Kuerz virun der Halbzeit dunn awer eng Onkonzentréiertheet am Dikrecher Strofraum bei engem Corner  an de Gaascht konnt den Uschlosstreffer erzielen.   Och an der zweeter Halbzeit huet et net un Ennerhalung gefeelt. Den Chinedu huet mat engem schéine  Solo vir den 4-1 gesuergt ier Wëntger dunn och per Eelefmeter den alen Ofstand erëm hiergestallt krut.  Dikrech huet sech kuerz gerëselt a war bis zum Schluss iwwerleeën mat enger Villzuel u gudde Chancen;  eng dovun konnt de Kim notzen an huet domat den 5-2 Endstand hiergestallt.   De nächste Match ass Dënschdes, den 13. Mee um 20 Auer zu Mamer. 1. Divisioun, 1. Bezierk, 23. Spilldag: Orania Veinen vs. Young Boys Dikrech 2-2 (0-1)  (26.04.2014)    De leschte Samschdeg waren d’Young Boys sech een Punkt op Veinen sichen, mat deem een sech  zefridde weise muss. De Match war vun den Spillundeeler ausgeglach, ma Veinen war awer méi  geféierlech an hat di eng oder aner gutt Chance. Dikrech koum awer lues a lues an de Match, an et war  de Ben deen sech e bemol alleng am Strofraum erëmfonnt huet an de Ball queesch bei de Chinedu  geluecht huet, deen en just nach huet missen an den eidele Gol drécken.   Di zweet Halbzeit huet dunn mat engem Schock ugefangen, wéi den Raf huet missen mat enger  Knéiverletzung an d’Klinik gefouert ginn. D’Jongen waren doropshin, wéi et schéngt, vun der Rull an  Veinen gouf ëmmer méi staark. Belount goufen si dunn mat engem Eelefter an kuerz drop mat engem  schéine Käppert. De Match war gedréit an et huet een gefaart, dat Dikrech sech net méi erhuele kéint.  D’Jongen hunn awer wieder drun gegleeft an di lescht 20 Minutten nachemol Gas ginn. Kuerz viru Schluss  krute mer e Fräistouss vun hallef lénks, deen dem Chinedu säi Kapp fonnt huet an et stoung 2-2. Feelend  Gléck vir di Veianer an de Belton hunn de Punkt dunn bis zum Schluss festgehal.   De nächste Match ass e Sonndeg um 16 Auer doheem um syntheteschen Terrain géint Wëntger. 1. Divisioun, 1. Bezierk, 22. Spilldag: Young Boys Dikrech vs. FC Atert Biissen 4-1 (2-0) (23.03.2014) Um Mëttwoch Owend hunn d’Young Boys héich verdéngt doheem géint Béiwen gewonnen. Dikrech war iwwer weit Strecken di besser Equipe an hat och di meeschte Chancen. Kuerz no engem Gol deen wéint Abseits net gezielt huet, kritt den Dani de Ball bal 30 Meter virum Gol an de Fous an schéisst d’Kugel iwwert de Golkipp an d’Netz. Kuerz duerno war et de Belton, deen d’Jongen mat enger gudder Parade am Spill hale konnt. Virun der Halbzeit dunn e Ball an de Laf vum Eder, deen de Golkipp tunnellen an de Virsprong ausbaue konnt. Mat der éischter Aktioun no der Paus war d’Mass dunn och well gelies: de Chinedu konnt sech duerch d’Baschte maachen an dréckt de Ball souverän an de laangen Eck. No zwee Aluminiumtreffer vir Dikrech huet Béiwen méi gedréckt an koum duerch Käppert nach zum  3-1. Dikrech huet bis zum Schluss novir gespillt a krut kuerz virum Enn nach en Eelefter, deen ouni Problemer verwandelt gouf. De nächste Match ass e Samschden den Owend um 18 Auer zu Veinen. 1. Divisioun, 1. Bezierk, 21. Spilldag: Avenir Beggen vs. Young Boys Dikrech 1-2 (0-0)  (13.04.2014)  E Sonndeg hunn d’Jongen héich verdéngt zu Beggen gewonnen, an dobäi hunn si et onnéideg spannend  gemaach. De Match war iwwer 90 Minutten vum Ballbesëtz hier ausgeglach. Dikrech huet no hannen awer den méi  konzentréierten Androck gemaach an iwwert de ganze Match nëmmen eng gutt Chance vir Beggen  zougelooss; de Jeff konnt déi awer mat engem super Reflex paréieren.  Dikrech hat an der éischter Halbzeit zwou 110% Chancen, zweemol war de Gol op wéi eng Scheierpaart,  zweemol krute mer de Ball net an d’Netz. Bei der éischter Geleeënheet emkreest de Chinedu de Golkipp  no enger schéiner Pass an d’Spëtzt, mee trefft dunn leider just d’Aussenetz. Puer Minutten drop steet de  Golkipp alleng op zwee Meter géint en Dikrecher Spiller, deen sech keen Eck mee de Golkipp eraussicht  vir dropzeschéissen. An der zweeter Halbzeit war et e Käppert vum Marino aus kuerzer Distanz riicht op de Golkipp. A wéi et  am Futtball sou oft ass, gëtt een bestrooft wann een d’Chance net notzt. An der 80. Minutt gouf et en  Eelefter vir den Haushär an et steet 1-0 vir Beggen. Dikrech huet awer net opginn, kloer Chancen sinn  awer bis an di 90. Minutt ausbliwwen. Kuerz viru Schluss schéisst de Mich dunn nach en Fräistouss  schaarf virun de Gol, an den agewiesselten Eder käppt den 1-1. A well Futtball heiansdo vir di eng sou  schéin, a vir di aner sou ellen ass, kënnt an der drëtter Minutt vun der Nospillzäit e laange Ball bei de  Miguel, deen en an de laangen Eck ka setzen sou datt de Match awer nach gedréit gouf. De nächste Match ass e Freiden an der Coupe FLF um 20 Auer auswäerts géint US Esch, d’Woch drop spille mer Mëttwochs, den 13. Abrëll um 19:30 Auer doheem géint Béiwen 1. Divisioun, 1. Bezierk, 20. Spilldag: Young Boys Dikrech vs. FC Atert Biissen 0-4 (0-2)  (06.03.2014)  Eng héich Defaite gouf et gëschter heiheem géint den FC Atert vu Biissen. Dikrech war di éischt Minutten  déi besser Equipe an hat och déi éischt gutt Chance, de Ball huet de Gol awer knapp verfeelt. Déi éischt  hallef Chance vir Biissen huet dunn zum 1-0 vir de Gaascht gefouert, dat wéi en Kullerball den Belton um  falsche Fouss erwescht huet an aus gutt 16 Meter lues an de Gol gerullt ass. Duerno war bei de Jongen  de Rimm e bëssen erof an Biissen konnt kuerz virun der Halbzeit op 2-0 erhéijen, dat no enger graffer  Feelpass an der Defense an engem schéinen 35-Meter-Lopp iwwert de Golkipp. An der zweeter Halbzeit huet Dikrech net opginn, déi beschte Chance gouf et no engem Lopp iwwert de  Golkipp deen awer vun engem Verteideger kuerz virun der Linn konnt ewech gekäppt ginn. Biissen hat elo  méi Reim am Mëttelfeld well Dikrech probéiert huet ze drécken an de Gaascht konnt dat och  notzen. En  schnellen Ugrëff iwwer rechts an e Schoss aus spatzem Wénkel huet den 3-0 bruecht. Kuerz drop  verléieren d’Young Boys och nach de Belton mat enger giel-rouder Kaart wéint Meckeren. Wéi di meescht  sech schonn mam 3-0 arrangéiert haten, spillt Biissen nach eng läscht déidlech Pass an de Jeff konnt den  4. Gol net méi verhënneren. Weider geet et de nächste Sonndeg um 16 Auer zu Beggen. Coupe FLF, 2. Tour: Yellow Boys Weiler vs. Young Boys Dikrech 1-3 (1-1) (02.04.2014)  Am zweeten Tour vun der Coupe FLF konnten d'Young Boys sech gëschter Owend 3-1 zu Weiler  duerchsetzen. Dikrech war an der éischter Halbzeit di méi aktiv Equipe an haten duerch zwee Weitschëss  vum Chinedu och di eicht Chancen. Besonnesch am Ëmschalten an am Konteren war de Gaascht ëmmer  geféierlech, an et war och een vun den Konteren di den Dani konnt notzen an den 1-0 schéissen. Duerno  koumen d'Jongen nach e puer Mol geféierlech an de Strofraum, mee den Ofschloss huet ze wënschen  iwwreg gelooss. Den 1-1 koum dunn aus heiterem Himmel; eng Aart Verzweiflungsschoss per Vollspann  aus gutt 20 Meter huet sech iwwert de Jeff am Gol an d'Netz gesenkt.  Am zweeten Duerchgang war et dunn en ausgeglachene Match ouni grouss Chancen op béide Säiten.  Eng flaach Pass an de Strofraum huet de Kim dunn mam Réck zum Gol ugeholl, sech schéi gedréit an de  Ball iwwert de Golkipp zum 2-1 vir Dikrech geloppt. Weiler huet doropshin gedréckt an Dikrech erëm  gekontert. 10 Minutte viru Schluss gouff et  dunn en kloren Eelefter vir Dikrech deen den Eder souverän  verwandele konnt. Kuerz drop gouf et dann och en Eelefter vir den Haushär, mee de Ball ass héich an de  Nuetshimmel geflunn.  De nächste Match ass e Sonnden um 16 Auer doheem géint Biissen. 1. Divisioun, 1. Bezierk, 19. Spilldag: US Feelen vs. Young Boys Dikrech 1-1 (0-0) (30.03.2014)  Et feelt net vill vir 3 Punkten ze kréien, mee iergendwéi soll et net sënn. Iwwer 90 Minutten waren d’Young  Boys an engem gréisstendeels schwaachen an langweilegen Match vir d’Supporter déi besser an déi méi  aktiv Equipe. Nennenswäert Chancen gouf et awer net.  Di lescht 20 Minutten sollten dunn a punkto Entertainment vir sou munches entschiedegen. Dikrech  schéisst den 1-0 no engem schéine Fräistouss virun de Gol vum Mich deen den Chinedu konnt  verwandelen. Kuerz drop huet Feelen sech Chancen erauspillt an de Match ass méi haart ginn. En  Eelefter huet den Haushär dunn erëm an d’Spill bruecht, mee en huet si och en Mann kascht deen virum  Strofstouss wéint Meckeren déi giel-rout Kaart krut. Kuerz duerno di nächst rout Kaart vir Feelen, deskéier wéint enger Noutbrems. Den fällegen Fräistouss vir  Dikrech huet näischt abruecht. Kuerz viru Schluss dann duecht den Arbiter sech „aller guten Dinge sind 3“  an schéckt och den Raf  mat enger rouder Kaart vum Terrain. De Grond dofir konnt sech och nach nom  Ofpaff keen erklären. En Mëttwoch schonn geet et weider, dat mam 2. Tour an der Coupe FLF um hallwer 8 owes zu Weiler. 1. Divisioun, 1. Bezierk, 18. Spilldag: Sporting Stengefort vs. Young Boys Dikrech 1-1 (0-0)  (23.03.2014)  Nodeems d’Young Boys de leschte Weekend hir éischt 3 Punkten doheem géint Kielen konnten feieren,  ass et gëschter leider nëmmen 1 Punkt ginn, woubei Dikrech ganz no un der zweeter Victoire  hannerteneen war. Stengefort hat iwwer 90 Minutten méi Ballbesëtz awer och grouss Problemer virun de Gol ze kommen. Et  war dunn och Dikrech mat der éischter gudder Chance wou de Ball vu riets flaach an de Strofraum koum  an nach e sou just vun engem Verteideger gekläert konnt ginn. Stengefort huet probéiert ze drécken mee  méi weit wéi bis virun de Strofraum ass et siele gaang. D’Jongen hu probéiert séier ëmzeschalten an de  Ball schnell an d’Spëtzt ze passen, wat an der zweeter Halbzeit besser funktionéiere sollt. Di lescht  Chance virun der Paus hat dunn awer nach Stengefort, de Weitschoss huet awer just d’Lat touchéiert. Di zweet Halbzeit war Dikrech dunn e bësse méi um Drecker, eng ähnlech Situatioun wéi an der éischter  Halbzeit hätt bal zum 1-0 vir de Gaascht gefouert, mee eisem Spiller ass de Ball virum Gol vun der  Schlapp gerutscht. An der 75. Minutt dunn den 1-0 vir Dikrech, dat no engem vun ville schnelle Bäll an  d’Spëtzt wou de Chinedu den Golkipp emkreest an annetzt. E wie esou oft gëtt een dann awer nach  bestrooft wann een net 90 Minutten (an e puer méi) wakreg bleift. An der leschter Minutt vum Match kritt  Stengefort en onnéidege Fräistouss an den Haushär käppt den 1-1. De nächste Match ass e Sonndeg, den 30. Mäerz um 16 Auer zu Feelen. 1. Division, 1. Bezierk, 17. Spilldag: Young Boys Diekirch vs. Kielen 1-0 (0-0) (18.03.2014)  De Gol huet de Chinedu geschoss. 1. Divisioun, 1. Bezierk, 16. Spilldag: Harel-Iischpelt vs. Young Boys Dikrech 2-1 (1-0)  (09.03.2014)  Um Leschte Sonndeg gouf et di éischt Néierlag an der Réckronn vir d’Young Boys zu Harel. Direkt den  éischten Ugrëff no 2 Minutten huet den Green Boys d’Féierung abruecht, dat wéi en laangen Ball iwwert  eis Defense en Stiermer fonnt huet deen alleng virum Golkipp de Ball souverän an de laangen Eck konnt  setzen. Duerno waren et awer d’Young Boys di d’Heft an d’Hand geholl hunn an och iwwer 90 Minutten  méi vum Spill haten. Di bescht Chancen goufen awer entweder leien gelooss oder wéint Abseits  zreckgepaff. An der zweeter Halbzeit war et dat zelwecht Bild, Harel huet gekontert an Dikrech krut sech virum Gol net  duerchgesat an och nach zwee vermeintlech Eelefter net gepaff. En Eelefter gouf et dunn op der anerer  Säit vir Harel, mee de Belton konnt de Ball halen an huet d’Jongen am spill gehal. Aus der beschter  Chance vir den Haushär gouf dunn awer den 2-0 realiséiert, dat no engem schéine Schoss aus gutt 16  Meter an de Wénkel. Den Chinedu huet sech doropshin en Häerz gefaasst an eng Hand voll Hareler  Spiller stoe gelooss an per Sololaaf den Ball per Potto an d’Netz gesat. Dikrech, di di lescht Minutten dunn  erëm an Iwwerzuel wéint enger giel-rouder Kaart gespillt huet, huet bis zum Schluss alles probéiert, mee  den verdéngten 2-2 wollt net méi falen. De nächste Match doheem géint Kielen ass op Dënstes, den 18. Mäerz um 20 Auer verluecht ginn. 1. Divisioun, 1. Bezierk, 15. Spilldag: FCM Young Boys Dikrech vs. Résidence Walfer 1-1 (0-1)  (01.03.2014)  Um Samsdeg den Owend war et de nächsten 1-1 vir des Réckronn an der Partie vun de Young Boys  doheem géint Walfer. Dobäi ass de Match ganz ähnlech gelaf wéi deen d’läscht Woch zu Luerenzweiler.  Dikrech ass erëm schwéier bis guer net an d’Zweekämpf komm an et hat een bis zum Schluss  d’Impressioun, datt ëmmer ee Meter gefehlt huet. Walfer hat dunn och di éischt Chance, wéi zu  Luerenzweiler aus abseitsverdächteger Positioun, mee de Belton konnt de Schoss paréieren. Den Corner  deen doraus resultéiert ass geet dunn flaach duerch de Strofraum, laanscht u Frënd a Feind, bis en  Walferer Spiller de Fous dotëscht kritt an et steet 1-0 vir de Gaascht. Duerno hunn d’Spiller vun der Résidence awer e Gank eraus geholl an Dikrech koum sou lues an d’Spill,  leider ouni grouss Chancen. Dat sollt sech an der zweeter Halbzeit awer änneren. No enger gudder 20  Minutten konnt den Walferer Golkipp e Käppert nach esou just erausfëschen, kuerz duerno hat en awer  keng Chance méi, wéi de Ben sech iwwer rechts duerchsetzt an seng Flank de Chinedu fënnt, deen  schéin per Fluchkäppert den Ausgläich marquéiert. Walfer war ab do erëm wakreg an et ass hin an hier  gaangen. Kuerz vir Schluss krut dunn e géigneresche Spiller, wéi zu Luerenzweiler, eng giel-roud Kaart,  mee et ass vir d’Jongen wéi d’Woch virdrun alt erëm net duergaangen nach den 2-1 ze schéissen.   De nächste Match ass e Sonndeg um 4 Auer zu Harel.  1. Divisioun, 1. Bezierk, 14. Spilldag: FC Lorentzweiler vs. Young Boys Dikrech 1-1 (1-0)  (25.02.2014)  Mat 2 verluerene Punkten ass Dikrech gëschter Owend an d’Réckronn gestart. Luerenzweilerer war di  éischt Halbzeit di besser Equipe. D’Young Boys koumen net an d’Zweekämpf mee hunn sech trotzdem e  puer Chancen duerch Konteren erausgespillt. Di bescht dovun hat den Raf, deen alleng virum Golkipp  nëmmen knapps verfeelt huet. Aus engem Aworf fir Dikrech an der géignerescher Halschent ass dunn per  Konter den 1-0 vir d’Haushären gefall, een Schock vun deem d’Jongen sech bis an di zweet Halschent net  erholl hunn. Luerenzweilerer hat dunn och di éischt Chancen am zweeten Duerchgang, mee de Belton konnt zweemol  op der Linn klären. Eng giel-rout Kaart vir de Géigner huet eis dunn awer nees an d’Spill bruecht, an bis  zum Ofpaff war et en eenzege Stuermlaaf vun de Young Boys. De Ben huet 10 Minutte viru Schluss dunn  de Bann mat engem Gewaltschoss vun hallef lénks gebrach, an d’Jongen wollten onbedéngt nach di 3  Punkte mathuelen. Leider sollt fehlend Gléck, Onverméigen an den géignereschen Golkipp dat ze  verhënnere wëssen. De nächste Match ass e Samschden den Owend um 18 Auer doheem géint Walfer. Coupe FLF: Young Boys Dikrech vs. US Suessem 2-0 n. V. (0-0) (1.12.2013)  Mat enger Victoire geet et vir d’Young Boys an d’Wanterpaus, dat ganzt an engem spannenden Match an  der Coupe FLF géint Suessem, géint déi Dikrech virun zwee Méint nach aus der Coupe de Luxembourg  geflunn ass. Di éischt Halbzeit war relativ ausgeglach matt zwou gudde Chancen vir béid Säiten. Zweemol war et eng  gutt Reaktioun vum jeeweilege Golkipp an d’Lat di konnten de Réckstand verhënneren. An der zweeter  Halbzeit ass et dunn méi hëtzteg um Terrain ginn. Vill haart Zweekämpf an eng roud Kaart vir Dikrech  wéint enger Onbeherrschtheet hu vir e richtege Pokalfight gesuergt, leider hunn béid Equipen et verpasst  sech nennenswäert Chancen erauszespillen. Zu 10 Mann ass et dunn vir Dikrech an d’Verlängerung gaangen, an där si di besser Equipe waren. No  enger Rei gudder Chancen setzt de Nelson alles op eng Kaart an iwwerrascht den Suessemer Golkipp  mat engem Schoss aus gutt 40 Meter, deen genau ënnert d’Lat passt. D’Jongen spillen dorops wéi befreit,  et hat ee net d’Gefill wéi wann de Géigner ee Mann méi um Terrain hätt. No dengem Konter an der  Nospillzäit schlänzt de Paulo dunn de Ball schéin an de laangen Eck, an de Sack war zou.  ***** 1. Divisioun, 1. Bezierk, 13. Spilldag: Young Boys Dikrech vs. FC 32 Mamer 0-6  (0-1)  (24.11.2013)  Mat enger och an der Héicht verdéngter Néierlag schléissen d’Young Boys di éischt Halschent vum  Championnat of. Di éischt Chance vum Match gouf well direkt vum Gaascht ausgenotzt, wéi de Ball e fräie  Spiller am Strofraum fonnt huet deen aus e puer Meter konnt an de kuerzen Eck verwandelen. Dikrech  huet sech awer net verstoppt an hat dräimol d’Chance zum Ausgläich, dräimol waren d’Jongen quasi  alleng virum Gol an dräimol war de Schoss net präzis genuch. Mamer op der anerer Säit ass di eng oder  aner Kéier un eisem Golkipp, dem Belton, verzweifelt an et ass mat engem 0-1 an d’Paus gang.  No der Paus huet Mamer dunn gewisen wisou si den Opstiegskandidat Nummer 1 sënn. Dobäi hunn  d’Young Boys et hinnen mat dem engen oder anere Feeler och liicht gemaach. Mol war et een ze kuerze  Reckpass, mol Stellungsfehler, mol e Fräistouss deen verwandelt gouf während de Golkipp nach  amgaang war d’Mauer ze stellen. Et huet esou oft geschellt dat een sech nët mei un de genauen Oflaf  kann erënneren, op alle Fall stoung et zum Schluss 0-6 an et ass keng nennenswäert Chance vir Dikrech  an der zweeter Halbzeit ze vermellen.  De nächste Sonndeg as dann de leschte Match virun der Wanterpaus am Kader vun der Coupe FLF um 4  Auer doheem géint Suessem.  ***** 1. Divisioun, 1. Bezierk, 12. Spilldag: Wëntger vs. Young Boys Dikrech 3-1 (0-1) (17.11.2013)  3-1 vir den Haushär huet et gëschter geheescht, an et weess nach ëmmer kee sou genau firwat dat esou  huet misse kommen. D’Young Boys waren di éischt Halbzeit total dominant, hunn strukturéiert nofir gespillt  a keng grouss Chancen hannen zougelooss. Zweemol Potto, en Käppert zum verdéngten 1-0 an nach een zu Onrecht zeréckgepaffene Spiller alleng virum Gol ënnersträichen de staarken Optrëtt vun Dikrech, di an der Paus hätte missen méi däitlech a Féierung sënn. Mee wéi dat am Futtball esou ass, gëtt een dann oft bestrooft wann een de Sack net zoumécht. Kuerz no  der Halbzeit gëtt een op d’mannst zweifelhaften Handelefter gepaff an kuerz duerno eng kloer  Behënnerung vun eisem Golkipp am Fënnefmeter net gepaff, an e bemol stoung et 2-1 vir Wëntger ouni  datt et virdrun kloer Chancen ginn hätt. D’Jongen hunn sech vun deem Schock net méi erholl an se waren  an hirem Spill och net mer erëm ze erkennen. Den 3-1 kuerz viru Schluss war no enger Rei geféierlecher  Ugrëff di logesch Konsequenz.  De nächste Match ass e Sonndeg, den 24. November um 4 Auer heiheem géint Mamer. ***** 1. Divisioun, 1. Bezierk, 11. Spilldag: Young Boys Dikrech vs. Orania Veinen 1-1 (10.11.2013)  No enger hallwer Éiwegkeet gouf et endlech erëm 1 Punkt vir d’Youngboys, wann och ee glécklechen. An  engem spannende Match spillen si 1-1 doheem géint Veinen an haten suguer den 2-1 kuerz viru Schluss  um Fouss. D’Orania war di besser Equipe an hat iwwer 90 Minutten di meeschten Chancen. Dikrech huet awer och  matgespillt, och wann d’Ugrëff meeschtens virum Strofraum hänke bliwwe sinn, esou huet een awer ee  gudde Grapp voll duerchduechten Kombinatiounen  an e puer gutt Chancen gesinn. Veinen hat an der  éischter Halbzeit Pech wéi si no engem Fräistouss nëmmen d’Lat getraff hunn. Dikrech verpasst am  Géigenzoch nëmmen knapp de Gol an hat och eng gutt Fräistoussméiglechkeet. Di zweete Kéier  Aluminium dunn vir d’Gäscht mee deskéier hat den Belton nach d’Fanger drun. Di zweet Halbzeit huet dunn besser vir d’Jongen ugefang di sech iwwer rechts duerchsetze konnten an  den Ofschloss nëmme knapp laanscht gaangen ass. Kuerz duerno en ähnlechen Ugrëff iwwert di Säit, just  dat de Ball deskéier gepasst huet an et stoung 1-0. Di Veiner wollten dat net op sech sëtze loossen an  hunn een geféierlechen Ugrëff nom anere gestart. E flaache Ball an d’Mëtt huet dunn engem Stiermer säi  Fouss fonnt an et stoung 1-1. D’Schlussphase war vun villen Ugrëff, Foulspiller an Kontere geprägt, de  Belton huet de Ball nach zweemol un den Aluminium geleet, de Raf leeft kuerz viru Schluss alleng op de  Gol a geréit de Ball leider net richteg. Ënnert dem Strich een gléckleche Punkt an trotzdem iergendwéi och  net onverdéngt. Nächste Sonndeg spille mer um 3 Auer zu Wëntger. ***** 1. Divisioun, 1. Bezierk, 10. Spilldag: US Béiwen vs. Young Boys Dikrech 2-1 (1-0) (03.11.2013)  Di nächst batter an och erëm onnéideg Néierlag gouf et vir d’Young Boys um Sonndeg zu Béiwen. Dobäi  hunn d’Jongen vun Ufank un deen méi frëschen Androck hannerlooss, mee d’ersatzgeschwächten Equipe  konnt sech no vir net duerchsetzen. Di éischt gutt Chance war dunn och vir d’Haushären, mee de Jeff am  Gol konnt de Ball géint en alleng geschlossene Stiermer nach paréieren. Kuerz virum Pausenthéi dunn  den 1-0 vir Béiwen, wéi en Spiller iwwer riets konnt op de Gol zéien an de Ball an de laangen Eck  verwandelen. No der Halbzeit spillt Dikrech stiermesch an rosen no vir a muss bis zum Schluss vum Match op Konteren  oppassen. Een am Fong harmlosen Ugrëff iwwer lénks bréngt dunn no 5 Minutten an der zweeter Halbzeit  den 2-0, dat nodeems souwuel dem Spiller dee geflankt huet wéi och deem, deen an der Mett gekäppt  huet ze vill Plaatz gelooss ginn ass. Duerno Dikrech mat de bessere Chancen, een Gewaltfräistous kann  vun der Béiwener Defense nach gekläert ginn, en aneren Distanzschoss lant just um Potto. Kuerz viru  Schluss dunn endlech eng Pass an d’Déift an de Ball lant am laangen Eck zum 2-1. Bis zum Schluss gouf  dunn alles novirgeheit, och de Golkipp, mee de Ball wollt einfach net méi iwwert d’Linn.  De nächste Match ass e Sonndeg um 4 Auer heiheem géint Veinen. ***** 1. Divisioun, 1. Bezierk, 9. Spilldag: Young Boys Dikrech vs. Avenir Beggen 1-3 (18.10.2013)  Um Freiden den Owend gewënnt den Avenir Beggen verdéngt mat 3-1 zu Dikrech. De Gaascht war och  vun Ufank un di besser Equipe, och wann di éischt gutt Chance vir d’Young Boys war. Kuerz duerno den  éischte gudden Ofschloss vu Beggen, mee de Ball huet just d’Lat gesträift. Den 0-1 dunn no engem  Ballverloscht an der Defense deen de Géigner zu engem plazéierte Schoss aus 16 Meter notze konnt. An der zweeter Halbzeit koum Dikrech besser an d’Spill mee zu kenge kloren Goalchancen. Een  ofgefälschte Fräistouss huet sou missen hierhalen vir den 1-1. Duerno war et e Match op Aenhéicht awer  ouni groussaarteg Chancen vir béid Equippen. Aus dem Neicht stoung dunn bemol e Beggener Spiller  riets fräi, leeft alleng op de Gol an iwwerwënnt de Golkipp zum 2-1 vir den Avenir. Kuerz viru Schluss  mecht Dikrech op a kritt den Konter deen de Sack zou mecht. De nächste Match ass den 3. November zu Béiwen.  ***** 1. Divisioun, 1. Bezierk, 8. Spilldag: FC Atert Biissen vs. Young Boys Dikrech 4-1 (0-1)  (13.10.2013)  E weideren schwaarze Sonndeg vir Dikrech, an dat no enger richteg gudder éischter Halbzeit. D’Jongen  stoungen hannen disziplinéiert an den Haushär huet 45 Minutte laang kee Mëttel fonnt vir eis Defense ze  iwwerwannen. Di eng oder aner Flank ass alt emol an de Strofraum komm, mee keng vun hinnen war  präzis genuch. Dikrech huet et iwwert d’Säite probéiert, awer ouni nennenswäert Chancen. Een direkte  Fräistouss duerch den Eder aus eppes méi wéi 16 Meter huet dunn d’Féierung bruecht, an et hat een  d’Gefill et wier haut eppes dran. Di zweet Halbzeit koumen d’Young Boys dunn wéi ausgewiesselt aus de Kabinnen, am negative Sënn. No  3 Minutten hat Biissen de Match gedréit. Den Ausgläich war eng Co-Produktioun tëscht Verteideger a  Golkipp di sech net eenz gi sënn an den Biissener Stiermer Merci fir den eidele Gol konnt soen. Kuerz  duerno gouf en anere Stiermer am Strofraum vun de Been geholl, den Eelefter gouf mat e bëssen Gléck  verwandelt. 10 Minutten duerno dunn erëm eng gutt Pass an d’Déift, de Biissener Ugräifer emkreest de  Golkipp an d’Mass war gelies. Nach eppes fir d’Aen gouf et dunn no enger knapper hallwer Stonn an der  zweeter Halbzeit mam ofschléissenden 4-1 duerch e schéine Weitschoss an de Wénkel.  Nächste Rendez-vous ass e Freideg um 8 Auer owes heiheem géint Beggen. ***** Coupe de Luxembourg, 3. Tour: US Suessem vs. Young Boys Dikrech 3-2 (2-0) (06.10.2013)  Am éischten a leider och läschten Optrëtt an der Coupe hunn d’Young Boys e Sonndeg an engem  spannende Match mat 3-2 zu Suessem de Kierzere gezunn. An den éischte Minutten hat Dikrech méi vum  Spill ouni awer nennenswäert Chancen erauszespillen. Suessem ass mat der Zäit ëmmer méi staark ginn  an hat och di eicht grouss Chance duerch ee Käppert deen widdert de Potto gaang ass. No zwee staarken Ugrëff iwwert hier riets Säit huet Suessem dunn direkt zweemol och agenetzt, béide  Kéieren konnten d’Jongen de schaarfe Ball an de Strofraum net klären. Bis an d’Halbzeit krut Dikrech de  Ball net uerdentlech duerch d’Mëttelfeld gedroen an d’Haushären hunn och keen vun hire Konteren bis  zum Ofschloss bruecht.  Positiv d’Reaktioun dunn an der zweeter Halbzeit vun den Young Boys, di kämpferesch awer ouni di  néideg Fortune aus der Kabinn koumen. Di éischt gutt Chance dann duerch en oofgefälschte Schoss aus  der zweeter Rei, deen dem Golkipp bal ze laang gouf. Suessem dunn am Géigenzoch bal mam 3-0, mee  de Schoss huet just d’Lat getraff. Een wäiten Oofschlag vun eisem Golkipp lant dunn beim Miguel deen  alleng op den Suessemer Keeper duerleeft an hien zum 2-1 iwerloppt. Kuerz duerno dunn eng ähnlech  Situatioun, e wäite Ball iwwerflitt d’géigneresch Defense, de Golkipp kläert ausserhalb vum Strofraum an  de Kim kann aus iwwer 20 Meter den Ausgläich marquéieren.  Suessem war awer just kuerz geschockt an no engem Ballverloscht an der Mëtt konnt ee Stiermer an de  Strofraum eralafen an den Ball an de laangen Eck plazéieren. Dikrech huet alles ginn bis zum Schluss  mee et sollt net méi duergoen. De nächste Match am Championnat ass nächste Sonndeg um 4 Auer zu Biissen.  ***** 1. Divisioun, 1. Bezierk, 7. Spilldag: Young Boys Dikrech vs. US Feelen 0-1 (29.9.2013)  De Wuerm ass am Moment dran bei de Young Boys, de Weekend gouf et eng 0-1 Néierlag doheem géint  d’Schlussliicht Feelen, woumat Dikrech elo di läscht Platz an der Tabell anhëlt. Di éischt Halbzeit war et en Duell op Aenhéicht mat enger gudder Chance op all Säit. Di éischt war fir  Dikrech mat engem Schoss an de kuerzen Eck, mee de Golkipp war op Trapp. Feelen hat duerno eng gutt Méiglechkeet mat engem Fräistouss deen Richtung Wénkel geflunn ass, mee de Jeff konnt de Ball nach e  sou just erausplécken. Kuerz virun der Halbzeit huet et dunn gerabbelt: no engem Corner käppt en  Dikrecher de Ball eraus, de Ball trëfft awer onglécklech vir d’Young Boys de Kapp vun engem Feelener  Stiermer an et stoung 1-0 vir de Gaascht. An der zweeter Halbzeit stoung Feelen déif an disziplinéiert, hir Konterchancen konnten se awer net  notzen. Dikrech huet gedréckt mee meeschtens war eng gutt 20 Meter virum Gol Schluss. Di bescht  Chancen dunn duerch e Fräistouss aus gutt 30 Meter deen de Golkipp awer am Nogräifen paréiere konnt.  Esou ass et beim 0-1 bliwwen a mir waarden säit bal engem Mount op op d’mannst een Punkt.  De nächste Sonndeg ass den éischte Match an der Coupe um 4 Auer zu Suessem. ***** 1. Divisioun, 1. Bezierk, 6. Spilldag: Young Boys Dikrech vs. Sporting Stengefort 0-1 (22.9.2013)  Vir d’eicht huet een kee Gléck, an dann kennt och nach Pech dobäi. Woubäi dat eegent Onverméigen och eng Roll gespillt huet. Alt erëm waren d’Young Boys op d’Chancen an op d’Spill gesinn di besser Equipe, mee all dat netzt  näischt wann de Prinzip „ween se fir net eran schéisst, kasséiert se hannen“ antrëtt. Stengefort hat eng  Chance an der éichter Halbzeit, Dikrech ass  méi wéi eng Kéier virum géigneresche Gol opgetaucht, oft  iwwert di staark rechts Säit, mee konnten hir Chancen net notzen. No engem Fräistouss léisst den  Stengeforter Golkipp de Ball prallen an am Nogräifen erwëscht en en Dikrecher Spiller. Konsequenz:  Eelefter, mee och deen sollt net genotzt ginn an et goung mat engem glécklechen 0-0 vir de Gaascht an  d’Paus. No der Paus dat selwecht Bild, Dikrech mat de besseren Ugrëff an de bessere Chancen, mee den  Ofschloss huet ze wënschen iwwreg gelooss. An wéi et dann sou oft ass, kritt een dann no engem  eenzegen Fehler hannen dran d’Quittung, Stengefort sot Merci a versenkt de Ball wi e Stiermer bal alleng  virum Gol opgetaucht ass. Och d’Schlussoffensiv huet näischt bruecht, dat obwuel d’Jongen dräimol  alleng virum Gol stoungen. D‘Leeschtung u sech stëmmt positiv, d’Chancenverwäertung an d’Resultat nach net. Courage Jongen, e Sonndeg den 29. September geet et um 4 Auer doheem géint Feelen weider. ***** 1. Divisioun, 1. Bezierk, 5. Spilldag: FC Kehlen vs. Young Boys Dikrech 3-0 (18.9.2013)  Di englesch Woch leeft bis elo net gutt vir Dikrech, et gouf di nächst héich Néierlag e Mëttwoch den  Owend zu Kehlen. Dat obwuel d’Young Boys vun Ufank un di besser Equipe war mee ouni  nennenswäerten Ofschloss. Di eicht Chance war vir d’Haushären mee de Kehlener Spiller huet de Gol no  engem Fräistouss knapp verfeelt. En Eelefter huet dunn den 1-0 vir de Géigner bruecht, dat kuerz  nodeems d’Young Boys en Eelefter op der anerer Säit net gepaff kruten. Kuerz virun der Paus dunn  d’Chance vir den 1-1, mee de gudde Golkipp huet de Käppert a leschter Sekonn nach aus dem kuerzen  Eck gepléckt. D’Jongen sinn motivéiert aus der Paus komm mee hu sech selwer mat engem Fehler am Strofraum  bestrooft an et stoung 2-0. Kuerz drop gouf et eng kloer roud Kaart vir Dikrech an d’Loft war eraus. Kuerz  viru Schluss krute mer dunn och nach zu 10 den 3-0 geschoss, dat no engem Gestocher am Strofraum  wou een Kehlener am séiersten reagéiert huet an de Ball ënnert d’Lat geknuppt huet. De nächste Match ass e Sonndeg um 4 Auer doheem géint Stengefort. ***** 1. Divisioun, 1. Bezierk, 4. Spilldag: Young Boys Dikrech vs. Harel-Iischpelt 1-4 (15.9.2013)  Eng batter a gefillten vill ze héich Néierlag doheem gouf et dëse Sonndeg géint d’Green Boys vun Harel-  Iischpelt.  An der éischter Halbzeit hunn sech béid Equipen neutraliséiert, et bleiwen virun allem eng gutt Chance vir  Harel-Iischpelt, déi de Jeff am Gol konnt paréieren an op der anerer Säit eng en Solo vum Ben vir  d‘Haushären, mat engem Schoss op d’Aussenetz. Opreegung gouf et dunn och an béide Strofreim: een  Spiller vun de Gäscht ass gefall, krut awer iwwerraschend eng giel Kaart wéint Schwalb, bal am  Géigenzoch hätt et dunn Eelefter vir Dikrech misse ginn, mee den Tackle vum Golkipp um Spiller gouf net  gepaff. Mat Eelefterdecisiounen as et dunn och no der Paus weidergaang. De Gaascht krut no puer Minutten en  kloren Strofstouss zougesprach an et stoung 0-1. Keng Minutt duerno kombinéiere si dunn nachengkéier  duerch eng veronséchert Defense an et stoung 0-2 no 10 Minutten an der 2. Halbzeit. Erëm nëmmen puer  Minutte méi spéit dunn en Eelefter vir Dikrech deen vum Eder verwandelt gouf. Dikrech huet op den2-2 gedréckt, hat awer net di néideg Fortune virum Strofraum. Harel-Iischpelt hunn  deels gutt gekontert an goufen eng véierel Stonn viru Schluss belount, dat wéi e freie Stiermer de Ball  konnt iwwert de Golkipp loppen. Kuerz viru Schluss hu mer dunn och nach den 1-4 misse schlécken, dat  no engem Ugrëff iwwer lenks an engem Ofpraller, deen de Stiermer ouni Problem am eidele Gol  ënnerbruecht huet. De nächste Match ass schonns e Mëttwoch den Owend um hallwer 8 Auer zu Kielen.  ***** 1. Divisioun, 1. Bezierk, 3. Spilldag: Résidence Walfer vs. Young Boys Dikrech 0-1 (8.9.2013)  Eng glécklech awer och wichteg éischt Victoire gouf et e Sonndeg vir eis Jongen zu Walfer. An engen ennerhaltsame Match haten d’Young Boys vun Ufank un méi Ballbesetz, allerdéngs ouni sech  kenne grouss Chancen erauszespillen. Esou waren et och d’Haushären, déi sech mat enger Hand voll  gudder Konteren hätte missen d’Féierung secheren, mee hiren Ofschloss war ni präzis genuch. Op  Dikrecher Säit war just een Käppert ze notéieren deen de Gol knapp verpasst huet. Nom Pausenthéi hunn d’Jongen méi déif agéiert vir di néideg Stabilitéit erëmzefannen. Et waren awer di  Walferer, déi di eischt gutt Chance haten, den Lopp vum Stiermer ass awer nëmmen op der Lat gelant. Am Géigenzoch dunn och eng Grousschance vir Dikrech, mee de Golkipp konnt géint de freien Dikrecher  Stiermer paréieren. Di läscht hallef Stonn hat et dunn an sech. Dikrech krut ënner Protester en Eelefter gepaff, dat kuerz  nodeem op der anerer Säit eng ähnlech Situatioun lafe gelooss gi war. De Protest vun engem Walferer  Spiller war sou staark, datt en sech eng giel-roud Kaart siche gaang ass. Den Eelefter gouf vum Eder  secher verwandelt, an 10 Walferer hunn tapfer bis zum Schluss gekämpft. Dikrech hat eng grouss Zuel u  Chancen duerch Konteren mee huet keng genotzt. Mee och d’Haushären hunn eis schlecht defensiv  Beweegung genotzt, di gréisst Chance huet den Jeff am Gol awer verhënnert. No 5 Minutten Nospillzäit dunn den erléisenden Ofpaff vum Arbiter an di eicht 3 Punkten vir des Saison  waren am Sack.  De nächste Match ass e Sonndeg, um 4 Auer doheem géint Harel-Iischpelt. ***** 1. Divisioun, 1. Bezierk, 2. Spilldag: Young Boys Dikrech vs. FC Luerenzweiler 0-1 (1.9.2013)  E Sonnden hunn d‘Young Boys di eicht Néierlag vun dëser Saison missen astiechen, an dat an engem  ongléckleche Match zu deem et am Fong net vill ze ziele gëtt. Luerenzweiler hat iwwer 90 Minutten méi  Ballbesëtz ouni sech kennen Groussschancen erauszespillen. Di eicht gutt Chance vum Match haten  d’Haushären, mee eise Stiermer ass alleng virum Gol um gudde Golkipp hänke bliwwen.  Am Géigenzoch gouf de Ball dunn vun Dikrech erëm recuperéiert, mee en ganz schlëmmen Oofspillfehler  huet d’Gäscht erem an d’Spill bruecht, an e plazéierte Schoss aus 16 Meter huet den 1-0 bruecht. Duerno  war et e Match op Aenhéicht mee leider och op relativ déifem Niveau. Dikrech war beméit den Ausgläich  ze schéissen mee den Ofschloss oder di läscht Pass waren einfach ze onpräzis. Luerenzweiler huet  probéiert de Ball ze halen oder ze konteren, ouni nennenswäerten Erfolleg. Esou ass de Match dunn no  enge sëllechen Verletzungspausen an Feelpäss op en Enn gaangen. De nächste Match vun eise Jongen ass nächste Sonndeg um 4 Auer zu Walfer. ***** 1. Divisioun, 1. Bezirk, 1. Spilldag: Minerva Lëntgen vs. Young Boys Dikrech 2-2 (25.8.2013)  Een dramatesche Match gouf et gëschter direkt um éischte Spilldag vun der néier Saison zu Lëntgen. D’Haushären haten am Ufank méi vum Spill an et war eemol den Jeff am Gol an zweemol eng  Abseitsdecisioun déi gutt Chancen verhënnere konnten. Mam éischte gudden Ugrëff stoung et dunn 1-0  vir d’Young Boys. Eisen néien an ale Captain, de Marinho, huet e laange Ball vun hanne riets no vir an de  Stuerm geschloen, wou eise néie Stiermer, den Eder, den Verteideger konnt iwwerlafen an de Golkipp  iwwerloppen. Ab do huet sech en hëtzegen a spannende Match entwéckelt. Ugefangen huet de ganzen Zirkus mat enger rouder Kaart vir de Jeff, deen de Ball ausserhalb vum  Strofraum soll mat der Hand geholl hunn. Direkt am Géigenzoch dunn den 2-0 vir Dikrech, rëm duerch den Eder, deskéier per Kapp. Kuerz duerno di nächst rout Kaart, deskéier vir den Heldrad wéint enger  ugedéiter Tätlechkeet, dat nodeems hien un den Hoer gezunn gouf, wat awer vun den Arbiteren leider net  gesi gouf. Zu 9 hun d’Jongen du probéiert den Virsprong an d’Paus ze retten, wat leider net gelénge wollt;  den 2-1 duerch e schéinen Weitschoss an de Wénkel gouf kuerz virun der Halbzeit geschoss. An der zweeter Halbzeit war et dunn den erwaarte Match op ee Gol, bei Dikrech huet een vir den anere  gekämpft, an Lëntgen hat grouss Problemer sech gutt Chancen erauszespillen. Kuerz viru Schluss ass et  dunn awer nach zum Ausgläich komm, dat awer anscheinend no engem Foulspill un eisem Captain, wat  awer net gepaff gouf. Ënnert dem Strëch ee Punkt vir d’Moral, dat ganz no iwwer 60 Minutten zu 9 um Terrain.  Nächste Match ass e Sonndeg, den 1. September um 4 Auer doheem géint Luerenzweiler. *****